Arba’in An-Nawawi Hadits kaping #36: Nggampangaké Urusané Kaum Muslimin
NGGAMPANGAKE URUSANE KAUM MUSLIMIN
عَنْ أَبِيْ هُرَيْرَةَ رضي الله عنه قال, قال رسول الله صلى الله عليه وسلم قَالَ: مَنْ نَفَّسَ عَنْ مُؤْمِنٍ كُرْبَةً مِنْ كُرَبِ الدُّنيَا نَفَّسَ اللهُ عَنْهُ كُرْبَةً مِنْ كُرَبِ يَوْمِ اْلقِيَامَةِ، وَمَنْ يَسَّرَ عَلَى مُعَسِّرٍ يَسَّرَ اللهُ عَلَيْهِ فِيْ الدُّنْيَا وَالآَخِرَةِ، وَمَنْ سَتَرَ مُسْلِمَاً سَتَرَهُ اللهُ فِيْ الدُّنْيَا وَالآخِرَةِ، وَاللهُ فِيْ عَوْنِ الْعَبْدِ مَا كَانَ الْعَبْدُ فِي عَوْنِ أَخِيْهِ، وَمَنْ سَلَكَ طَريقَاً يَلْتَمِسُ فِيْهِ عِلْماً سَهَّلَ اللهُ لَهُ بِهِ طَرِيْقاً إِلَى الْجَنَّةِ، وَمَا اجْتَمَعَ قَوْمٌ فِي بَيْتٍ مِنْ بُيُوْتِ اللهِ يَتْلُوْنَ كِتَابَ اللهِ وَيتَدَارَسُوْنَهَ بَيْنَهُمْ إِلاَّ نَزَلَتْ عَلَيْهِمُ السَّكِيْنَةُ وَغَشِيَتْهُمُ الرَّحْمَةُ وحَفَّتْهُمُ الْمَلاَئِكَةُ وَذَكَرَهُمُ اللهُ فِيْمَنْ عِنْدَهُ، وَمَنْ بَطَّأَ بِهِ عَمَلُهُ لَمْ يُسْرِعْ بهِ نَسَبُهُ .رَوَاهُ مُسْلِمٌ بِهَذَا اللَّفْظِ.
Saking Abu Hurairah radhiyallahu anhu, saking Kanjeng Nabi shallallahu alaihi wa sallam dhawuh:
Sing sapa wongé nggangsaraké urusané salah sawijiné mukmin ana ing donya, mangka Allah bakal ngilangaké salah siji kesusahané ana ing akerat.
Sing sapa wongé nggampangaké urusané wong kang nandhang kesusahan, Allah bakal nggampangaké urusané ana ing donya lan akerat.
Sing sapa wongé nutupi cacadé sawijiné wong kang muslim, mangka Gusti Allah bakal nutupi cacadé ana ing donya lan akerat.
Gusti Allah bakal tansah paring pitulungan marang kawulané, nalika kawulané mau gelem tetulung marang seduluré.
Sing sapa wongé lumaku ana ing sanduwuré dalan kanggo ngudi ngélmu (agama), yekti Allah bakal nggampangaké kanggo dhéwéké dalan tumuju suwarga.
Yekti, nalikané sawijiné kaum ngumpul ana ing sawijiné masjid, banjur padha sinau lan maca kitabullah, mangka Allah bakal numurunaké katentreman lan rahmat. Uga bakal padha di kepung dening para malaikat.
Lan Gusti Allah bakal ngalembana marang dhéwéké ana satengahé para malaikat kang mapan ing sakiwa tengené.
Sing sapa wongé telat nindakaké amalé, Yekti ora bisa dioyak kanthi nasabé.
(Hadits punika dipun riwayataken dening Imam muslim)
Alih basa dening : Abul Akhmar bin Hadi Al Djawi
Artikel Basa Jawi Alukhuwah.Com
