Arba’in An-Nawawi Hadits kaping #29: Perkara perkara Kang Utama

PERKARA PERKARA KANG UTAMA

عَنْ مُعَاذِ بْنِ جَبَلٍ رضي الله عنه قَالَ: قُلْتُ: يَا رَسُولَ اللهِ، أَخْبِرْنِي بِعَمَلٍ يُدْخِلُنِيْ الْجَنَّةَ، وَيُبَاعِدُنِي عَنِ النَّارِ، قَالَ : لَقَدْ سَأَلْتَنِي عَنْ عَظِيمٍ، وَإِنَّهُ لَيَسِيرٌ عَلَى مَن يَسَّرَهُ اللهُ عَلَيهِ: تَعْبُدَ اللهَ وَلاَ تُشْرِكُ بِهِ شَيْئًا، وَتُقِيمُ الصَّلاَةَ، وَتُؤْتِي الزَّكَاةَ، وَتَصُومُ رَمَضَانَ، وَتَحَجُّ الْبَيْتَ، ثُمَّ قَالَ: أَلاَ أَدُلُّكَ عَلَى أَبْوَابِ الْخَيْرِ؟ الصَّوْمُ جُنَّةٌ، والصَّدّقَةُ تُطْفِئُ الْخَطِيئَةَ كَمَا يُطْفِئُ الْمَاءُ النَّارَ، وَصَلاَةُ الرَّجُلِ فِي جَوْفِ اللَّيْلِ, قَالَ: ثُمَّ تَلاَ (تَتَجَافَى جُنُوبُهُمْ عَنِ الْمَضَاجِع )حَتَّى بَلَغَ (يَعْمَلُونَ) ثُمَّ قَالَ : (أَلاَ أُخْبِرُكَ بِرَأْسِ الأَمْرِ كُلِّهِ وَعَمُودِهِ وَذِرْوَةِ سَنَامِهِ؟ قُلْتُ: بَلَى يَا رَسُولَ اللهِ. قَالَ: رَأْسُ الأَمْرِ الإِسْلاَمُ, وَعَمُوْدُهُ الصَّلاَةُ, وَذِرْوَةُ سَنَامِهِ الْجِهَادُ. ثُمَّ قَالَ: أَلاَ أُخْبِرُكَ بِمَلاَكِ ذَلِكَ كُلِّهِ؟ قُلْتُ: بَلَى يَا نَبِيَّ اللهِ، فَأَخَذَ بِلِسَانِهِ وَقَالَ: كُفَّ عَلَيْكَ هَذَا. فَقُلْتُ : يَا نَبِيَّ اللهِ, وَإِنَّا لَمُؤَاخَذُوْنَ بِمَا نَتَكَلًّمُ بِهِ؟ فَقَالَ : ثَكِلَتْكَ أُمُّكَ يَا مُعَاذُ، وَهَلْ يُكَبُّ النَّاسُ فِي النَّارِ عَلَى وُجُوهِهِمْ أَوْ عَلَى مَنَاخِرِهِمْ إِلاَّ حَصَائِدُ أَلْسِنَتِهِمْ؟ رَوَاهُ التِّرْمِذِيُّ وَقَالَ: حَدِيْثٌ حَسَنٌ صَحِيْحٌ .

Saking Mu’adz bin Jabal radhiyallahu anhu, piyambakipun ngendika:

Aku matur marang Kanjeng Nabi:

Dhuh Kanjeng Nabi, mugi Panjenengan kersa paring pangertosan dhumateng kula amalan ingkang saged nglebetaken kula dhateng suwarga saha nebihaken kula saking neraka.

Kanjeng Nabi shallallaahu alaihi wa sallam dhawuh:

Satemené sira wus nakokaké perkara kang gedhé, ananging gampang di tindakaké kanggoné wong kang di gampangaké dening Allah.

Ngibadaha marang Allah lan aja tumindak syirik. jejegna shalat, tetepana zakat, pasa ana ing wulan ramadhan lan tindakna haji ana ing Baitullah.

Nuli Kanjeng Nabi shallallaahu alaihi wa sallam nerusaké dhawuhé:

Apa sira gelem dak tuduhaké dalan dalan kabecikan?

Yekti pasa iku pinangka taméng, sedhekah iku nyurudaké dosa kaya dené geni kang kasiram banyu. Lan tindakna shalat ana ing tengahing wengi.

Kanjeng Nabi shallallaahu alaihi wa sallam banjur maos (dawuhipun Allah) :

“wetengé padha adoh saka papan turuné…”

Nganti tumeka ing

“…Kang padha di tindakaké” (Q.s As Sajadah : 16 – 17).

Banjur Kanjeng Nabi shallallaahu alaihi wa sallam dhawuh :

Apa sira gelem dak terangaké apa kang dadi pokoké, panyanggané (cagaké) lan pucuké sakabéhé perkara?

Aku matur : purun dhuh Kanjeng Nabi…

Rasulullah shallallaahu alaihi wa sallam nuli dhawuh:

Pokok sakabéhé perkara yaiku islam, shalat kang dadi panyanggané lan jihad kang dadi pucuké.

Kajeng Nabi shallallahu alaihi wa sallam dhawuh : apa sira gelem dak terangaké perkara kang bisa njaga kabeh (kabecikan) kui mau?

Aku matur marang kanjeng Nabi :

Purun dhuh Kanjeng Nabi…

Kanjeng Nabi shallallaahu alaihi wa sallam banjur nyepeng lidhahé sinambi dhawuh :

Jaganen iki (lisan)!!!

Aku matur marang kanjeng Nabi :

dhuh Kanjeng Nabi, napa kita badhé dipun siksa jalaran menapa ingkang kita ucapaken?

Kanjeng Nabi dhawuh :

Muga muga ibumu kelangan marang sira (ukara iki mengku werdi supaya nggatékaké pangandikané Kanjeng Nabi) satemené manungsa iku ora bakal gejlungup ana neraka, kajaba merga pangucapé.

(Hadits punika shahih dipun riwayataken dening Imam At Tirmidzi)

Alih basa dening : Abul Akhmar bin Hadi Al Djawi

Artikel Basa Jawi Alukhuwah.Com