Arba’in An-Nawawi Hadits kaping #10: Sebab Dikabulaké Donga
SEBAB DI KABULAKÉ DONGA
عَنْ أَبِيْ هُرَيْرَةَ رَضِيَ اللهُ تَعَالَى عَنْهُ قَالَ: قَالَ رَسُوْلُ اللهِ: (إِنَّ اللهَ تَعَالَى طَيِّبٌ لاَ يَقْبَلُ إِلاَّ طَيِّبَاً وَإِنَّ اللهَ أَمَرَ المُؤْمِنِيْنَ بِمَا أَمَرَ بِهِ المُرْسَلِيْنَ فَقَالَ: (يَا أَيُّهَا الرُّسُلُ كُلُوْا مِنَ الطَّيِّبَاتِ وَاعْمَلُوْا صَالِحاً) (المؤمنون: الآية 51) ، وَقَالَ: (يَا أَيُّهَا الَّذِيْنَ آمَنُوْا كُلُوْا مِنْ طَيِّبَاتِ مَا رَزَقْنَاكُمْ) (البقرة: الآية 172)،ثُمَّ ذَكَرَ الرَّجُلَ يُطِيْلُ السَّفَرَ أَشْعَثَ أَغْبَرَ يَمُدُّ يَدَيْهِ إِلَى السَّمَاءِ: يَا رَبِّ يَا رَبِّ، وَمَطْعَمُهُ حَرَامٌ، وَمَشْرَبُهُ حَرَامٌ، وَمَلْبَسُهُ حَرَامٌ وَغُذِّيَ بِالحَرَامِ فَأَنَّى يُسْتَجَابُ لِذَلِكَ) رَوَاهُ مُسْلِمٌ.
Saking Abu Hurairah radhiyallahu anhu ngendika:
Rasulullah shalallahu alaihi wa sallam dawuh :
Satemené Gusti Allah iku becik (ora ana cacadé), lan ora nampa kajaba saka perkara becik uga. Yekti Allah mréntahaké marang sakabéhé wong wong kang mukmin kaya déné apa kang di prentahaké marang para Rasulé.
Allah ta’ala paring dawuh:
Heee para Rasul, mangana sira saka (panganan) kang becik, lan padha nindakna tumindak kang becik.
(QS. Al Mukminuun ayat kaping 51).
Lan uga Allah ta’ala dawuh:
Heee wong wong kang padha iman, padha mangana sira saka rejeki kang becik, kang wis ndak paringaké marang sira.
(QS. Al Baqarah ayat kaping 172).
Sabanjuré Rasulullah ngendikakaké sawijiné pawongan kang wus sawetara sué anggoné lelungan, rambuté katon kumel uga gupak lebu, banjur dhéwékè nyadhongaké tangané tumuju langit (donga),
“Ya Rabbi,,, Ya Rabbi,,, “
Ananging panganané haram, nginumané haram, sandhangané haram, lan dhéwékè wareg saka barang kang haram, bajur kepié dongané bakal dikabulaké?
(Hadits punika shahih, dipun riwayataken dening Imam Muslim)
Alih basa dening : Abul Akhmar bin Hadi Al Djawi
Artikel Basa Jawi Alukhuwah.Com
